“I was sexually attracted to Bugs Bunny.”

Hérna höfum við dæmi um þrjá menn sem eru dæmdir til að koma saman, Robert Crumb, David Lynch og Terry Zwigoff. Crumb og Zwigoff kynntust sem áhugamenn og sfnarar á gömlum Jazz-og blúsplötum og Zwigoff sannfærði Crumb um að leyfa sér að gera mynd um síðustu mánuði hans í Bandaríkjunum áður en hann flutti til Frakklands með fjölskyldu sinni. Síðan gekk Lynch inn í dæmið sem framleiðandi. Úr varð þessi afar áhugaverða, skemmtilega, skrýtna og margverðlaunaða mynd.

Robert Crumb, sem er betur þekktur sem R. Crumb, er líklega best þekkti listamaðurinn í hreyfingu neðanjarðarteiknara sjöunda áratugarins. Hann er með afar sérstæðan stíl og umfjöllunarefni og verk hans hafa valdið töluverðum deilum. Það er erfitt að meta hvort hann er hræddur við konur, er með ádeilu á sýn karla af konum eða er fullur fyrirlitningar á þeim. Sama mætti segja um framsetningu hans á kynlífi og kynþáttunum. Það er hægt að túlka verk hans á jákvæðan hátt sem háðsádeilur eða neikvæðan hátt sem tjáningu á hatri og hræðslu. Dæmi hver fyrir sig, því Crumb gerir í raun lítið til að skýra afstöðu sína.

Á hinn bóginn verður persónan Crumb mun skýrari. Það hjálpar ef til vill við að túlka verk hans, en hefur meiri gildi til að skilja hann sjálfan og það óvenjulega umhverfi sem hann kemur úr. Hann á fjögur systkini, systur hans neituðu að koma að gerð myndarinnar en bræður hans eiga ríkan þátt í frásögninni og við uppgötvum að þó Crumb sé furðulegur maður er hann ef til vill eðlilegastur í sinni fjölskyldu. Hann er í öllu falli ekki sá eini með listræna hæfileika, eins og kemur berlega í ljós.

R. Crumb kann að vera furðulegur, neikvæður pervert en það er ekki hægt annað en að hafa gaman að honum.

Kinofíll ráðleggur:

Terry Zwigoff:

Louie Bluie (1985)

Ghost World (2001)

Bad Santa (2003)

David Lynch:

Eraserhead (1977)

The Elephant Man (1980)

Dune (1984)

Blue Velvet (1986)

Wild at Heart (1990)

Lost Highway (1997)

The Straight Story (1999)

Mulholland Dr. (2001)

Inland Empire (2006)

Twin Peaks þættirnir (1990-1991)

Gert eftir verkum Crumb:

Fritz the Cat (1972)

(Klassík, en Crumb afneitar henni.)

Berman/Pulcini:

American Splendor (2003)